Thor Magnus Tangerås
Literature and Transformation. A Narrative Study of Life-Changing Reading Experiences. Fagbok. Anthem Press 2020
Ø. Dikt. Samlaget 2022
Landskap med vindturbinar
Dikt
Samlaget
Oslo 2024
© Det Norske Samlaget 2024 www.samlaget.no
Omslag: Tina Tømmeraas Aasvestad
Førtrykk: Magnus Osnes
Skrift: Garamond Premier Pro 11,5/14 pkt.
Papir: 100 g Munken Premium Cream
Trykkeri: ScandBook AB, Falun
Printed in Sweden
ISBN 978-82-340-1229-7
Denne boka er trykt på miljøvenleg papir.
Materialet i denne utgjevinga er verna etter åndsverklova. Det er difor ikkje tillate å kopiera, avfotografera eller på andre måtar gje att eller overføra heile eller delar av innhaldet i utgjevinga utan at det er heimla i lov eller følgjer av avtale med Kopinor.
All bruk av heile eller delar av utgjevinga som inndata eller treningskorpus i generative modellar som kan skapa tekst, bilete, film, lyd eller andre typar innhald og uttrykk, er ikkje tillate utan særskild avtale med rettshavarane.
Bruk av materiale frå utgjevinga i strid med lov eller avtale kan føra til inndraging, erstatningsansvar og straff i form av bøter eller fengsel.
Turning and turning in the widening gyre
The falcon cannot hear the falconer
WILLIAM BUTLER YEATS: THE SECOND COMING
V V v v v v v v v v v v
FUGANE
har du høyrt
storlomens rop
ljoma om holmane
i moe stunder
har du kome over eit lirypereir
blant fjellbjørk og vier mens du leita etter
ro
har du sett tranas venger
vida seg ut over tjernet
årle om morgonen
9
skimta du heiloas drakt
som ein halo over heia
i lisa frå kveldslyset
har du kjent tjeldens fluktlydar
kila seg inn i øyremuslingane i det sanden renn ut
mellom tærne
har du speida etter stormsvala
ho som kvarv i kimminga ho som vart svelgd
i havgapet
10
vart du skaka
då ho-hubroen letta
på høgspente venger mellom stolpeleidningane
og styrta i skumringa
om du hadde kunna lyda til tremoloen nattestid
frå islomen som sirklar over smeltande sjøislommer
ville du ha merka ein annan timbre?
har du stussa over at det ikkje lenger aular i åkeren
av fjåke måker som hyppar med nebbet som ard mens dei lyttar i fòrer og mold
etter ein fuge i mørkeret
11
ensa du annsemda inst i vika
av brusande fjører, marmande sjø når dverggjæsene fór gaglevegen
til himheimen i nordvest
augna du enkel- eller dobbelbekkasinen
i kystlyngheia som brann i solnedgangen
vart du fanga på musvåkens kamera
då du tok snarevegen
over myrane
12
har du høyrt eventyret om dei tolv hundre prinsane
som vart forheksa og omskapte til
vindvette
veivande med dei lange armane sine for at prinsesse vindblome
skal høyra det susa og buldra over hole torvmyrar
og koma for å frelsa dei
13
LOKK
kom nå
kom overrislingsberg og flygesanddyne
kom silt, kom dryppstein kom kystgrotte, kalktuff og sukkertareskog
kom strandeng og rikaste vierstrandskog kom nå humøse, djupe innsjøar
legg dokker inntil oss inntil verdsens ende fortel med melismar
om det som synest å vera utan tideller heimfesting
det forsagde det forlagde det fortagde
lag på lag av litoralia
14
PSALMODIA
fønen stryk så lett over
f jellfiol og linblomar
f lageoletttonar som
f rå ein lilla & gul fiolin
15
I
og kveldsvinden smyg seg
i engsvingel og smyle
som ein landstrykar
over solefallsslettene
heimlengsleslengande
og kornsirkelspringande
ber han med seg, i seg
ei etterlysing, eit signalement
II
har du sett ein jordkropp som svarar
til desse særsvipane
16
VAGANTVISE
dueauge og hårlokkar strøymande som
geiteflokkar nedetter fjellsida
tinningar som granatepleskiver og
lepper som band av skarlak
elfenbeinsmage overstrødd med safirar
davidstårnhals og bryst som gasellkalvar
III
vil du vera med og leita etter henne som eg elska
så høgt og lågt – ho som er komen
bort ifrå meg – tusse-, skur- og sogekjerringa
plukk med deg villblomar sju eller ni slag
raud jonsokblom, ryllik og skogstorkenebb
17
raudkløver, prestekrage og krypsoleie
enghumleblom, kvitkløver og smørblom
plasser dei under høyendet samankjeda i ring mot sola
IV
eller kle deg ut som raud skogfrue
pynt stilkvasshåret med solblom
ta på deg kystmarikåpe og marisko
rekk ut purpurmarihanda og ta sorgal imot brudelyset
18
HØGSONG
sol og vind over heia
kyndlar tendrar
i raudfiolett røsslyng
kolvar tinklar
i bleikrosa klokkelyng
som solvind langt av leia
19