« Aguesta sason era seccion de hons, qu’enes darrèri ans auie patit bèri cambis comencaue damb ua illusion renauida » Aguesta illusion comencèc damb era naua Junta Directiva que s’estrenaue e metie tota era confidança ena estructura organitzativa e tecnica d’aguesta seccion, e ara quau aprofiti des d´aguestes linhes entà arregraïrli eth sòn supòrt . Carlos Sanlhey, ath deuant dera seccion des dera Junta s’a implicat eth toti aguesti tèmes, tostemp dificiles, de relacions damb es federacions e estaments que pòden e an de facilitar-mos era practica d’aguest espòrt ja sigue a nivèu de competicion e/o d’òci. Tanben ei era contínua relacion e ajuda damb era figura deth coordinador tecnic, foncion que realizi jo madeish. Coma entrenadors auem compdat damb David Cester, Ares Higuera e Nuria Pericas, damb es quaus e, tostemp eN collaboracion, auem esquiat e entrenat a un grop de 20 mainatges d’edats comprenudes entre 4 e 14 ans. Er aprendissatge des tecniques de classic sustot, e patinador a estat fòrça positiu entà toti eri e tanben auem hèt evident qu’era formula de compaginar esquí aupin e de hons en aguestes edats resulte deth tot positiu entara mielhora de toti es aspèctes coordinatius e tecnics qu’eth hons requerís. A nivèu de competicion auem estreat era collaboracion damb eth grop esportiu Vitaldent-Aran e que s’a pogut visualizar enes Campionats de Catalonha, era Marcha Plan d´Estan, era Marcha Naut Aran e era Marcha Beret. Damb aguesta
collaboracion artenhem optimitzar recorsi enes desplaçaments e preparacion deth materiau e es nòsti corredors d’ara e deth futur poderàn aprofitar-se de toti es coneishements qu’es tecnics e corredors deth Vitaldent an anat aquerint enes darrèri ans. Aguesta relacion tanben a era volontat de poder auer ua equipa de hons de nivèu que represente ara Val d´Aran aquiu a on vage e defene es interèssi dera nòsta val. Aguesta equipa compde damb Rubén Caseny, que dempús d’ua sason dificila artenhec ua 5au posicion ena Marcha Beret e que competís damb eth nòste club. Voi des d’aciu felicitar-lo, animar-lo e arregraïr-li eth sòn supòrt tecnic e uman pendent era sason. Ua des nauetats qu’auem incorporat enguan en programa son es diuèrses excorsions e esquiades dehòra deth circoït de Beret, un escambi damb era equipa infantila de Benasque, ua esquiada nocturna cap a Montgarri e posterior entrenament aquiu madeish londeman. Tot açò a servit entà hèr equipa e conéisher a tot un grop de pairs que m’an ajudat ena organizacion d’aguestes activitats e qu’an pogut compartir er ambient nòrdic, a toti eri fòrça gràcies. Ua des aspiracions qu’auem entara pròplèu campanha ei arténher auer un grop d’entrenament annau ,que pogue participar en mès marches e mielhorar era sua tecnica ath madeish temps, que gaudisque de toti aguesti aspèctes formatius que compòrte viatjar, compartir e conéisher d’auti esportistes e lòcs. Fin finau, e coma tostemp i a quauquarren negatiu, enguan a requeigut ena seccion de hons dera FCEH qu’a menspreat ad aguest club, as sòns tecnics e dirigents ena organizacion des Campionats d’Espanha d’esquí de hons que se celebrèren en Beret. Decidiren non compdar damb nosati entà
arren, e credem qu’ua federacion a de compdar damb toti es actius d’aguest espòrt qu’existissen en territòri, e eth CAEI des de hè fòrça ans ei un referent de dedicacion ar esquí de hons ena Val d’Aran e fòrça membres d’aguesta seccion formam part dera organizacion dera Marcha Beret, era competicion mès importanta de hons que i a en Espanha. Gràcies a toti es estaments deth club, e era sason que ven mès marcha….Dilhèu des de noveme.
Kim albeto C
ESQUÍ NÓRDICO | 27