Kaligila

Sipion, toupré Kaligila, san gadé’y an zié, épi an model lavanniz. “ Lachas bonnè-a ki ka fè moun inosan, Siel otila soley ka kannalé, Banbòch touyonn ek koutja, dépalaj-mwen-an bwaré èvè lespwa malpapay!... ” Kaligila, toudous.

Asé, ou lé? (Ba Sipion.) Ou bien jenn pou ou pé ja konnet sé bon lison lanmò-a.

Sipion, ka koutviyé Kaligila.

Man té bien jenn pou ped papa-mwen.

Kaligila, ka déviré (kò’y) blipman.

Annou, sé moun-lan, siktiré ran zot. An dibi powet sé an séraj ki two red ba gou mwen. Jik alè, man té ka sonjé gadé zot bò mwen kontel moun an bwaraj ek dèlè, man té la ka imajinen komkwa zot té key siktiré dènié masonn gad-kò mwen. Men, lapenn pa vo sa, ek man ké viré fouté zot anlè lis lennmi-mwen-an. Sé powet-la kont mwen, man pé di konsa chimen-an bout ba mwen.

Sòti yonn dèyè lòt! Zot ké défilé douvan mwen toupannan zot ké liché tablet-zot-la pou détrasé anlè’y sé mak malélivé zot-la. Pran gad! Bay douvan!

Kout souflet miziré. Sé powet-la, kiles ka maché dwet, ka sòti, pa an chimen ki adwet, toupannan yo ka liché tablet gayak-yo-a.

Epi an lavwa toudous menm.

Zot tout la, sòti.

Bo lapòt-la, Chéréa ka tjenbé primié patrisien-an pa zépòl.

Chéréa Tan-an rivé.

Jenn Sipion ki tann, ka bétikannen douvan lapòt-la épi i ka alé pa koté Kaligila.

Kaligila, an manniè mové.

Es ou pé pa fouté-mwen lapé-mwen, kon aprézan papa ka fè’y?