Kaligila

Chéréa Kidonk ou épi’y?

Sipion Awa. Men, man pé pa kont li. ( An tan, épi i ka palé an manniè toufé. ) Si man té ka tjwé’y, toufwazékant, tjè mwen té ké épi’y.

Chéréa Poutan, i tjwé papa’w!

Sipion Wi, sé la tout bagay ka koumansé. Men sé la osi, tout bagay ka bout.

Chéréa I ka dékonnet sa ou ka rikonnet. I ka kraché anlè sa ou ka vénéré.

Sipion Sa vré, Chéréa. Men, poutan, i ni an bagay andidan-mwen ka sanm-li toubonnman. Menm flanmdifé-a ka brilé tjè nou.

Chéréa I ni an tan otila fok ou chwèzi. Men, man ja toufé andidan-mwen sa ki té pé sanm li.

Sipion Man pé pa chwèzi, davwè an plis di sa man ka soufè, man ka soufè di sa i ka soufè tou. Malè mwen, sé konpwann tout bagay.

Chéréa Alò, ou ka chwèzi bay kont rézon’y.

Sipion, adan an kout kriyé.

Ho! Tanpri souplé, Chéréa, pensonn, pensonn pé ké janmen ni rézon douvan mwen!

An tan, yonn ka gadé lòt.

Chéréa, tjèsoté, ka vansé pabò Sipion.

Es ou sav man rayi‘y ankò plis pou léta-a i mété’w-la ?

Sipion Wi, i apwann-mwen egzijé tout bagay.

Chéréa Awa, Sipion, i rachétjè’w. Ek rachétjè an nanm, ki lòt jou-a wè soley, sé an mal ki ka dépasé tout mal i fè jik alè. Man ka pran lédié a témwen pou di ki ni asé la pou man tjwé’y, an manniè anrajé.

I ka bay alé pa koté lapòt-la. Ka paret Hélikon.