Kaligila

PRIMIE SEN Sen-la adan an dimi-fènwè. Ka paret Chéréa ek Sipion. Chéréa ka alé adwet, apré agoch épi i ka viré pa koté Sipion.

Sipion, ka sanm sa ki ni fidji’y maré.

Sa ou lé?

Chéréa Pa rété nou anpil tan. Nou pou djòkpann adan sa nou ké fè-a.

Sipion Ki moun ki di’w man pa djòkpann?

Chéréa Yè, ou pa vini adan sanblé-nou-an.

Sipion, ka détounen kò’y.

Sa vré, Chéréa.

Chéréa Sipion, man gran pasé’w ek sé pa labitid mwen mandé moun soukou. Men, sa vré man ni bizwen di’w. Dépannaj-tala ka mandé moun doubout ki pé pran responsabilité yo. An mitan tout sé lògey ta-a yo dérèspèkté ek tout sé mové lapè ta-a, i ni wou épi mwen selman ki ni tout rézon fè sa.

Man sav ki si ou kité nou tonbé, ou pé ké makoté ayen. Men sa pa ni pies potalans. Sa man lé, sé ou rété épi nou.

Sipion Man ka konpwann ou. Men man ka pran lédié a témwen pou di’w ki man pé pa fè sa.