Kaligila

Hélikon Kalmé, Mésié, kalmé. Annou séré sa ki rété la. Lanpi women, sé nou menm. Si nou ka ped lafas, Lanpi ka ped lakat. Sé pa lè-a pies toubonnman! Piespa! Epi dabò pou yonn, annou ay manjé!

Apré sa, lasanté Lanpi ké méyè.

Vié patrisien-an Ou ni rézon, ou sav sa ou ka kité, ou pa sav sa ou ka pran.

Chéréa Man pa djè enmen sa. Men tout bagay té ka maché two bien. Lanprè ta-a té an zafè’y.

Dézienm patrisien Sa vré, pou an zafè’y i té an zafè’y: sérié épi apranti douvan Lavi.

Premier patrisien Men, sa zot ni konsa a ? Poutji sa zot ka pléré la-a ? Ayen pa ka opozé’y suiv chimen‘y. I té jaja Drisila, asiré. Men sété sésé’y an final di kont ! Fè lanmou épi‘y, dabò pou yonn sé té anlo bagay. Men tenmbolizé Wom pas i mò, sa kité kouyonnad ka alé.

Chéréa Tou sa pa sa. Mwen pa enmen sa pies toubonnman, épi pangaldouvan ta-a pa ka pwonmet ayen di bon.

Vié patrisien-an Sa vré, lafimen pa ka fet san difé.

Primié patrisien An tou lé ka, rézon Léta pé pa admet masibolaj an frè èvè sésé’y ki ka sanm sé trajédi-a. Ki an frè jaja sésé‘y, nou dakò ! men dépi i pa lévé boukan.

Hélikon Zot sav an bagay han ! masibolaj an frè évè sésé’y, ki ou lé ki ou pa lé, sa toujou ka fè an kritjak.

Dapré mwen kabann-lan ka kratjé. Padon si man malélivé. Poudayè, ki moun ka di zot sé épi Drisila i yé ?

Dézienm patrisien Kidonk, di ki sa alò?