Kaligila

SEN IV An moun ka grafiyen lapòt an fas la. , Kaligila ka tounen viré Blipman épi i ka pèsivwè vié patrisien-an.

Vié patrisien-an, kokoplon.

Man pé, Kayis?

Kaligila, présé menm.

Eben! antré. ( La ka gadé’y.) Alò, ti-jòlòt doudou an mwen, ou ka viré vini wè Vénis!

Vié patrisien-an Awa, sé pa sa. Péla! Ho! padon, Kayis... man lé di... Ou sav man enmen’w anpil... épi, sel bagay man ka mandé’w sé fini vié jou mwen nan latrankilité...

Kaligila Ba kò’w balan! Fè vit!

Vié patrisien-an Wi, bon. Final di kont... ( Vitman présé.) Sa sérié menm, mi sé sa.

Kaligila Awa, sé ti afè.

Vié patrisien-an Men kisa, Kayis?

Kaligila Men di kisa nou ka palé-a, masibòl mwen?

Vié patrisien-an, ka gadé alantou’y.

Kivédi... ( I ka totiyé kò’y, ka déblozé an final. ) An konplo kont ou...

Kaligila Wè sa, sé sa man té ka di-a, sa pa sérié pies toubonnman.

Vié patrisien-an Kayis, yo lé dépann ou.

Kaligila, ka alé koté’y épi i ka tjenbé’y pa zépòl.

Ou sav poutji man pé pa kwè’w?

Vié patrisien-an, ka fè jès-la pou sèmanté.