Kaligila

PRIMIE SEN Yonn-dé patrisien oti ni yonn ki ni bon laj, sanblé adan an lasal chato-a toupannan yo ka sanm sa ki ovif.

Primié patrisien Ayen menm.

Vié patrisien-an Ayen bonmaten, ayen oswè.

Dézienm patrisien Ayen dépi twa jou.

Vié patrisien-an Mésajé ka pati, mésajé ka rivini. Yo ka soukwé tet ek yo ka di: “ Ayen. “ Dézienm patrisien Yo bat tout lakanpay-la ; ayen pou sa.

Primié patrisien Poutji sa zot ja ka chokolaté kò-zot konsa a? Annou atann. Nè i ké rivini menm manniè i pati.

Vié patrisien-an Man wè’y lè i kité chato-a. I té ni an manniè bililik ka gadé.

Primié patrisien Man té la tou ek man mandé’y sa i té ni.

Dézienm patrisien Es i réponn?

Premié patrisien An sel mo: “ Ayen “