Kaligila

SEN X Chéréa Man apwann ou viré. Man ka mandé lédié ba’w lasanté.

Kaligila Lasanté mwen ka rimèsié’w.( An tan épi blipman. ) Foutélikan, Chéréa, man pa lé wè’w.

Chéréa Ou ka siwprann mwen, Kayis.

Kaligila Fok pa ou siwpri. Man pa enmen litératè ek man pé pa sipoté véglaj yo. Yo ka palé pou yo pa pran tan kouté sa yo menm ka di. Si yo té ka kouté pawòl yo, yo té ké sav yo pa ayen toubonnman dontokèl yo pa té ké sa palé anko piès. Alé, fè chimen’w, man pa sa wè manti-mantè an zié.

Chéréa Si nou ka manti, souvan nou ka fè’y san sav. Man ka plédé man pa fotif.

Kaligila Véglaj pa janmen inosan. Ek ta’w la ka ba yètè ek bagay twop pòtalans. Mi sé sa mwen pé pa padonnen zot.

Chéréa Poutan, fok bien nou plédé ba limonn ta-a, si nou lé viv anlè’y.

Kaligila Pa pran lapenn plédé, man bien konpwann sa ou lé-a. Limonn ta-a pa ni pies valè ek moun-lan ki ka rikonnet sa genyen libèté’y. ( I doubout. ) E jistiman, man rayi zot padavwè zot pa lib. Nan tout grandè Lanpi women, mi sé mwen yonn ki lib. Kontan mésiézédam, an lanprè fin pa vini pou apwann zot lalibèté. Foutélikan, Chéréa ; wou tou, Sipion, lanmitié ka fè mwen ri. Alé di Wom kon sa libèté’y viré an lanmen’y ek épi’y an gran léprev ka koumansé.

Yo ka pran chimen déwò. Kaligila détounen kò’y.