Kaligila

SEN VII Lentandan-an, épi an lavwa kòkòdò.

Nou... nou té ka chèché’w, Séza.

Kaligila, épi an lavwa kout ki mofwazé.

Mwen ka wè sa.

Lentandan-an Nou... kivédi...

Kaligila, blogodo.

Kisa ou lé ?

Lentandan-an Nou té entjet, Séza.

Kaligila, kiles ka vansé anlè’y.

Ou té andwa ?

Lentandan-an Hé! héé... ( Blipman, an lidé vini’y épi vitman. ) Final di kont, an tout manniè, ou sav ou ni pou mété an lod do-twa ti bagay ka pòté asou Trézò piblik-la.

Kaligila, an ri san rété vougaré.

Trézò-a ? Men sa vré, annou, Trézò-a, sa fondal-natal.

Lentandan-an Asiré pa pétet, Séza.

Kaligila, ki la ka ri toujou, ba Sézonia.

Pa vré, machè, Trézò-a, sa pòtalan toubonnman ?

Sézonia Awa, Kaligila, nou pé wè sa apré.

Kaligila Kivédi ou pa konnet ayen an sa. Trézò-a ni kont lentéré‘y. Tout sé bagay-la ni pòtalans-yo: soumaké Léta, moralité piblik, politik andéwò, kantinaj lawmé-a épi sé koumandman lagrikilti ya. Tout bagay fondal-natal, man di’w. Tout bagay asou menm wotè : mapipians Wom ek sé kriz lartrit-ou a. Ha ! Mwen key otjipé kò-mwen di tou sa. Kouté mwen tibren, lentandan !

Lentandan Nou ka kouté’w...