Era seccion de cúrling deth CAEI daue inici ara sason en mes de seteme, damb era participacion des joeni jogadors dera equipa en Programa Nacionau de Tecnificacion Esportiua de Curling deth CSD 2011, celebrat en Palai de Gèu de Vielha. Pendent eth madeish, se hec ua jornada de promocion e iniciacion ath cúrling per part dera FCEH ena que participèren era rèsta dera equipa. Damb aguesta basa mos demoraue era 8au. Liga Catalana de Curling, enguan en format liga toti contra toti. Era equipa deth CAEI lo formauen aguesta sason es jogadores Anna e Judit Campás, Carla Badia, Marta Gasull e Marga Palacin ath costat deth skip Jordi Campás e eth contraròtle de tot çò que passaue Jose Badia. Era prumèra jornada d’aguesta Liga Catalana se disputaue en Vielha damb un gèu irregular. Eth prumèr partit contra era unica equipa femenin dera competición, eth Catalonha Curling, acabaue en derròta 3-17. Mès eth dusau, damb eth prumèr derbi dera sason contra eth CEVA 2002 s’artenhie ua empat a 7 e atau eth prumèr e darrèr punt dera liga. Atau de contenti disputam era 2au. jornada conscienti que lèu totes es equipes èren un gradon per dessús nòste. Pròva d’açò sigueren es resultats d’aguesta 2au jornada en dusau derbi damb eth CEVA 2010, ara fin campion dera 8au liga, perdíem per 11-5 mès en tot realizar bèra jogada de mèrit. Damb mès contundéncia perdíem eth 2au partit dera jornada 3-11 damb eth Puigcerdà Panxing Carlit. Ena 3au jornada dues naues derròtes mès seguíem damb lo nòste, seguir en tot perfeccionar eth nòste jòc e animar as nòstes 3 joenes jogadores, que les calie afrontar 2 naui partits dempús de lheuar-se d’ora e d’un viatge qu’ara fin se hè pesat enquia Puigcerdà. En prumèr des dus partits dera 3ª jornada perdíem damb contundéncia 3-13 damb eth subcampion dera liga eth Curling Barcelona “A”. Mès en dusau artenhem apropar-mos en mercador e pèrder de “sonque” 2 pèires 5-7 contra eth Puigcerdà Puigpedrós. Era 4au e darrèra jornada se presentaue longa, mos calie disputar 3 partits e lo mès
emocionant, eth campionat non ère decidit, ena part baisha encara auíem era oportunitat de deishar era coa dera taula. Entà afrontar era jornada en mielhores condicions anèrem a dormir en Puigcerdà, entà premiar atau as nòstes joenes jogadores qu’ac auien dat e jogant toti es partits. Eth prumèr des 3 partits acabèc damb ua naua derròta 4-14 damb eth Sporting L´olla Masculi. En dusau, eth nòste rivau ère eth sporting l´Ola Jaume damb eth qu´anàuem empatadi a 1 punt e era vertat ei damb eth que siguec un des mielhors partits de tot eth campionat entà nosati. Tanben perdérem mès sonque de 1 pèira 9-10 e damb ua equipa integralaments femenina que disputam damb eth, eth darrèr partit deth campionat, ja cansadi damb 4 ores de gèu e sense possibilitat de superar ath nòste rivau ena classificacion. Eth resultat siguec eth mès engrossit de tota era Liga en contra nòsta 2-17 contra eth Curling Barcelona Víctor. Ara fin celebram lèu com s’auesse estat nòsta, era victòria dera equipa deth CEVA 2010 e era dedicatòria a Tonet Cavero que morie pendent aguesta dimenjada dempús der accident qu’aueren en Montcorbison. Eth resumit dera Liga ei qu’auem competit damb toti es equipes e jogadors damb mès experiéncia, mès non auem lançat era tovallola en cap moment maugrat es derròtes
qu’auem patit. Ara sonque mos demore entrenar mès e mielhor e convidar ad aqueri sòcis e simpatizants deth CAEI. entà que compartisquen damb nosati aguest espòrt olimpic que se pòt participar damb tota era familha. Mos vedem enes pistes de gèu era pròplèu sason, dilhèu en tot agranir eth numerò de competicions, qui sap ...
José Badía FREESTYLE | 43