Dempús d’un long estiu, es prumères nheuades tardèren en arribar, atau qu´a manca de nhèu es grops de snowboard treiguérem es skates, desempovassèrem eth lhet elàstic e, sense pèrder ne ua menuta, comencèrem a sautar e esguitlar. Aguesta a estat, ua sason de cambi. Un cambi generacionau, pr´amor qu’es corredors de mès edat, mos an deishat entà centrar-se enes sòns estudis o entà formar-se e exercir coma professors de snowboard. Açò òc, deishant pas a un gran nombre de gojats e gojates fòrça joeni que des de que comencèc era mini sason de snowboard s’an animat a “surfejar” damb nosati. Aguesta sason, gràcies ara incorporacion d’un nau professor ena equipa, auem pogut aufrir un ensenhament mès adaptat as diferenti nivèus des mainatges e as sues edats. Hè dejà uns ans que des d´aguestes pagines demanàuem eth bastiment d’un snowpark en Baqueira e, quan ara fin lo auérem, tanben
des d’aguesta publicacion arregraïrem er esfòrç dera estacion. Mès ara un còp mès, coma professionaus, pr’amor qu´es gojats s´ac meriten, ja que viatgen e ven es installacions que i a en quinsevolh auta estacion e ven coma eth nivèu des qu’entrenen enes auti lòcs evolucione mès rapid, demanam un còp mès que se mielhore eth snowpark, e que non se dongue un pas endauant e tres endarrèr. E parlant deth snowpark, justaments podérem començar a utilizar-lo, pr´amor eth CAEI amassa damb era mèrca DESIGUAL e era estacion, organizèren eth 1st DESIGUAL – CAEI Freestryle Day de slopestyle. Un campionat dubèrt tant a snowboarders coma freeskiers de totes es edats enes qu´ es corredors deth club arrassèren maugrat èster eth prumèr dia dera sason que sautauen en park. Imaginar-vos s’auessen pogut entrenar! Entara pròplèu sason demoram poder compdar damb era dusau edicion deth desigual slopestyle, entà seguir en tot promòir eth snowboard e eth freestyle. Mès, a manca d’un bon snowpark, auem gaudit coma jamès, mielhorant es pistes,
practicant ena nhèu povàs, coneishent era montanha, era meteorologia e era nhèu. En tot apréner a bastir es nòsti pròpris sauts e en tot jogar ena estacion. E jogant auem aprenut toti a conéisher fòrça mès era nhèu, es sòns perilhs e es manères de previer-les, a utilizar es elements de recèrca en cas de laueg… Un pialèr de petites coneishences que mès endauant mos serviràn. Ara se mos acabe era nhèu mès, coma en començament dera sason, seguiram esguitlant ja sigue damb es nòsti monopatins, longboards o es nòstes taules de surf. Atau que, entara pròplèu sason, damb mès alumnes, damb mès ganes e damb mès nhèu!
Thor Farran
SNOWBOARD | 31