ESTUDIS E ESPÒRT Un camin plen de sacrificis e valors entàs nòsti joeni
7:00 ores. Un dia mès, tòque eth revelh, daurisqui es uelhs e veigui en lhet deth costat ad aquera persona que pendent diuèrsi mesi ac sò compartint tot damb eth, entrenaments, minjars, estudis, rivalitat e fòrça amistat. Mos lheuam e mos vestim entà amiar a tèrme era nòsta grana passion ¡¡¡esquiar!!! Vam a esdejoar sense pèrder ne un moment, pr´amor que tàs 7:00 ores mos recuelh er autobús que mos pòrte tà pistes damb era rèsta des nòsti companhs. Arribada en parcatge, prenem eth nòste materiau e toti amassa mos dirigim ara basa deth que poiríem cridar eth nòste telesèra, òc òc, mos referim ara Reina. E quan digui que poiríem díder qu’ei nòste, ei pr’amor qu’aquiu mos sentem coma en casa, eth personau mos cride peth nòste nòm, mos cueden coma se siguéssem part dera sua familha, mos protegissen, mos mimen e ath madeish temps mos dan eth “tòc” quan eth comportament non ei er adequat… Era vertat ei qu’en aguestes condicions e per molt fòrt que vage a èster eth dia, da gust arribar a entrenar. Ena basa dera cagira començam a cauhar, coma non, jos era supervision des nòsti tecnics. Pòc podem díder d’eri, mos exigissen moltíssim mès tostemp son es prumèri en arribar e es darrèri en anar-se, en tot hèr tot çò qu’ei enes sues mans entà qu’es condicions d’entrenament siguen es perfèctes entà nosati e exigint-se eth maximon d’eri madeishi… Açò sonque te hè auer ganes de que te daurisquen era cagira e començar a entrenar coma un hòl e dà’c tot en cada baishada. Quan daurissen era cagira hèm 2 o 3 baishades d’escauhament enes quaus cercam trobar bones sensacions sus es esquís, activar-mos en toti es nòsti sentits, repassar lo trabalhat en dies anteriors e premanir eth nòste còs entà començar a tope, en traçat qu’es tecnics mèrquen entà nosati. Non perdem ne un segon, en esquí coma en
fòrça espòrts eth temps ei aur. Quan èm premanidi mos dirigim ath traçat, entre 6 e 10 baishades, depenent dera modalitat son es que realizam, normauments enes condicions mès semblantes as d´ua corsa (cròno, mòno pelat,…). 11:00 ores. Er entrenament a acabat damb 2 baishades de retorn ara cauma mentre es tecnics recuelhen eth traçat, rapidaments mos cambiam, cau anar tar institut!!! Se poirie díder qu’eth nòste dia a acabat, mès toti sabem qu’açò non ei atau. Es professors e sustot era coordinadora des nòsti estudis, Lourdes España, son dessús nòste, entà qu´en cap moment deth dia mos relaxem e eth nòste nivèu academic non baishe. 17:00 ores. Tòque eth timbre e toti es escolans gessen der institut, mès nosati mos quedam… cau recuperar es ores qu’auem mancat peth maitin. Uns professors de repàs mos demoren enes aules entà ajudar-mos damb es matèries que non auem realizat, mos expliquen, mos esclarissen dobtes e mos hèn èster ath nivèu adequat entà poder seguir eth ritme dera classa. 19:00 ores. Gessem de repàs, ara òc que mos tòque anar tà casa, non??? Un aute dia serà, pr’amor qu’a nosati mos demore Juanka. Ua oreta de fisic ena que depenent deth trabalh de pistes e deth calendari de competicion, realizam un tipe de trabalh o un aute (fòrça, velocitat, coordinacion, pròpri, resisténcia, estiraments,…). Sigue lo que sigue, tostemp a tòpe e damb ganes, pr’amor que sabem dera importància qu’a aguest trabalh entà nosati. Passion que coma enes pistes, es nòsti tecnics tracten de transmeter-mos.
20:30 ores. Ara òc, mo´n vam entà casa, que tàs 21:00 ores mos demore era nòsta tutora entà sopar. Sopar en familha e moment de rialhes e descans, acompanhat d’un “colacao” e d’aguesti rivals en pistes que pòga pòc s’an anat convertint en mèn supòrt e ena mia familha, sense mès, enes mèns companhs e amics. Pr’amor qu’ara fin non sai se toti arribaram a lo mès naut, se sonque i arribarè jo o serà eth mèn companh eth qu´arribe o dilhèu toti mos quedaram peth camin… Mès aguesti moments, aguesta experiéncia, aguesti valors de luta e sacrifici acompanhat deth sentiment de grop e companherisme… Non le cambi per arren deth mon!!!
Juanka
Ramos
COMPETICIÓN | 11